Puntualizacións de ESTALMAT Galicia á comunicación publicada por Manuel Diaz Regueiro nas Áctas do V Congreso de Educación Matemática de AGAPEMA

(texto en pdf, texto da comunicación)

Diante das informacións inexactas e críticas sen fundamento verquidas polo presidente da Asociación Galega de Profesorado de Educación Matemática (AGAPEMA) nunha comunicación publicada nas páxinas 104-106 das actas do V Congreso de Educación Matemática de AGAPEMA, celebrado en Ferrol os días 25 e 26 de xuño de 2010, os abaixo asinantes, membros do Comité Organizador de ESTALMAT-Galicia,  queren facer chegar a toda comunidade matemática galega as seguintes puntualizacións:

 1.- Causa asombro e perplexidade ver publicada nas actas do Congreso de Educación Matemática de AGAPEMA unha chamada “comunicación” do seu presidente que non ten ningún contido nin de educación nin de matemática. Nela atacase con falsidades e de forma directa a compañeiros  cunha magnífica traxectoria profesional, utilizando sen pudor terxiversadas referencias a conversas e interpretacións que só serven a retratar á baixeza de quen as escrebe e a falta de rigor e seriedade de quen as autoriza a publicar nas actas dun congreso.

 2. - AGAPEMA presentou a primeira iniciativa para  organizar ESTALMAT_Galicia nunha reunión celebrada no Salón de Graos da Facultade de Matemáticas en decembro de 2006, á que se invitou expresamente ao Decano da Facultade de Matemáticas, Juan Viaño,  para recabar o apoio da Facultade ao proxecto, o que foi expresamente ofrecido. Nesta reunión acordouse iniciar de inmediato os traballos para presentar a proposta canto antes a Real Academia de Ciencias Exactas,  Físicas y Naturales (RAC).

3. - Despois dalgunha reunión máis en Santiago e Lugo, nas que se analizaron as posibilidades e as dificultades (sobre todo de xestión) que supoñía para AGAPEMA, o primeiro borrador da Memoria de presentación do Proxecto ESTALMAT-Galicia que se preparou  para enviar á RAC comezaba dicindo que o organizaba AGAPEMA coa colaboración da Facultade de Matemáticas da USC.

 4. - Por diferentes razóns, algunhas explicitadas polo presidente de AGAPEMA en diferentes correos electrónicos,  a Xunta Directiva de AGAPEMA en sesión formal celebrada na Sala de Xuntas da Facultade de Matemáticas, decidiu por maioría abortar a operación e desvincularse da organización de ESTALMAT-Galicia o que supuxo unha división importante e mesmo abandonos na citada Xunta Directiva de AGAPEMA. Unha das razóns determinantes, aínda que non a única,  foi a dificultade observada pola Directiva para a xestión económica que supoñía o proxecto.

 5. - A esas alturas AGAPEMA xa tiña designado a Mercedes Feijoo como responsable para asistir ao Seminario ESTALMAT en Barcelona do ano 2007 que, de feito, asistiu. Na RAC estaban esperando pola memoria e mesmo tiñan xa decidido celebrar no mes de xuño o seminario de preparación do profesorado en Santiago de Compostela pois dábase por feito que se iniciaban ese ano as actividades.

 6. -  A raíz da decisión de AGAPEMA, nunha reunión convocada por Mercedes Feijoo no IES Elviña da Coruña, o decano da Facultade de Matemáticas ofreceu a posibilidade de pilotar el o proxecto poñendo como condición que os profesores de ensino medio que estaban involucrados e presentes na reunión  así o decidisen e deixando claro que, de non ser así, el non botaría a andar o proxecto ese ano e deixaríase aparcado.

7. - A decisión foi unánime en favor de tirar para adiante cun comité organizador presidido por Juan M. Viaño, decano da Facultade,  Mercedes Feijoo como vicepresidenta,  e os demais membros do comité con varias áreas de responsabilidade (relación coas familias, páxina web, secretaría do comité, campamento matemático...).  Redactouse a memoria definitiva para enviar á RAC que emitiu informe favorable o 12 de abril de 2007, valorando moi positivamente que a organización se fixera con intervención de profesores da Facultade de Matemáticas.

 8. – Inmediatamente comezou a busca de patrocinadores: Vodafone_España, Deputación da Coruña, Caixa Galicia e posteriormente...I-Math Consolider, CSIC, Deputación de Lugo....O día 29 de xuño de 2007 tivo lugar a inauguración oficial de Estalmat_Galicia coa presenza do Reitor da USC, do director de ESTALMAT-España, e de representantes dos patrocinadores con destacada presencia do Presidente da Fundación Vodafone España que financia todos os Proxectos ESTALMAT de España.

 9. - Os días 28, 29 e 30 de xuño de 2007 celebráronse as xornadas de formación do profesorado que foran convocadas abertamente entre profesores de ensino medio e profesores da Facultade de Matemáticas. A Consellería de Educación e Ordenación Universitaria recoñeceu os cursos como actividade de formación permanente do profesorado.

 Dos 25 profesores asistentes, todos entraron no equipo docente de ESTALMAT-Galicia  e todos seguen formando parte del. Entre todos  decídese o programa de actividades académicas de cada ano coas directrices e pautas marcadas polo comité organizador e polos seminarios de formación de ESTALMAT-España. Os informes que se recollen dos estudantes e das súas familias corroboran a alta calidade dos profesores e o grao de satisfacción coa súa labor.

 10. – Os orzamentos anuais dependen das subvencións que se conseguen e a súa xestión regúlase polas normas de execución da Universidade de Santiago de Compostela e polos requisitos de xustificación que impoñen os organismos que conceden as axudas. Os fondos dedícanse a gastos de imprenta, quilometraxe, dietas e cursos a profesores e organizadores, bolsas de transporte para  familias de alumnos, campamento matemático, bebidas e refrixerio dos/as nenos/as a mediodía, gastos varios de organización... etc.

 11.- Dende o inicio decidiuse traballar só cunha sede en Galicia, sen descartar mais nun futuro. Actualmente tamén temos o ESTALMAT-PI en Lugo para os alumnos que acaban os dous primeiros anos. En calquera caso, as actividades previstas son para estimular o talento matemático dos nenos e das nenas que demostraron telo. Non de ofrecer entretemento matemático cada fin de semana a nenos e nenas que son bos estudantes de matemáticas.

 12. - Vimos de celebrar a cuarta convocatoria das probas de selección de ESTALMAT-Galicia. Son mais de 800 estudantes os que se teñen presentado as probas (337 en xuño de 2010). Cando comece o curso 2010-11 serán xa 100 os talentos matemáticos seleccionados. Sempre que contemos cos recursos necesarios, pensamos seguir coa actividade por convencemento e para dar unha resposta á vulnerabilidade e as posibilidades dos rapaces e das rapazas con talento matemático na comunidade galega e conseguir o mellor deles para proveito da sociedade do futuro.

Santiago de Compostela, 5 de xullo de 2010.